काठमाडौं । सहकारी सेवासहितको ब्यवसायका रुपमा लिइन्छ । ब्यक्ति समाज र राष्ट्रको आर्थिक सामाजिक र सास्कृतिक उत्थानकालागि सहकारीले कर्म गर्नुपर्छ भनिएको छ ।

यसैको उदाहरण हो कोशी प्रदेश झापामा रहेको कर्णाली बचत तथा ऋण सहकारी । झापाको विर्तामोडमा मुख्य कार्यालय रहेको संस्थाले एक आर्थिक वर्षमा सामाजिक कर्मकोलागि साढे तीन करोड बढी खर्च गरेको छ ।

संस्थाले सदस्य र समुदयकालागि विभिन्न ९ वटा शीर्षकमा ३ करोड ४९ लाख १८ हजार १४४ रुपैंयाँ बितरण गरेको जनाएको छ । संस्थाले ३ हजार ७ सय ६५ जनालाई उपचार खर्च, सुत्केरी खर्च, मृत्यु राहतलगायतमा सदस्यलाई राहत बितरण गरेको हो ।

झापा, मोरङ र इलाम जिल्ला कार्यक्षेत्र रहेको संस्थाले आफ्ना सदस्यको विशेष उपचार कोषमा आवद्ध ४५९ जना सदस्यको स्वास्थ्य उपचारमा १ करोड २० लाख ६५ हजार ८८७ रुपैयाँ खर्च भएको जनाएको छ ।

त्यसैगरी संस्थाले ७९१ जना सदस्यलाई साधारण उपचार सुविधा वापत ५० लाख ३४ हजार २६३ रुपैयाँ खर्च गरिएको लेखा विभाग प्रमुख लक्ष्मी भट्टराईले जानकारी दिए ।

संस्थाका सदस्य तथा परिवारका सदस्यको निधन भएमा समवेदनासहित मानोचामल र मृत्यु राहतबापत १ हजार ५५५ सदस्यको सुविधामा १ करोड १७ लाख ८४ हजार २१८ रुपैयाँ खर्च गरेको जनाइएको छ ।

संस्थाले ७३९ जना सदस्यलाई सुत्केरी सुविधावापत ३० लाख १४ हजार खर्च गरिएको जनाएको छ । यसैगरी संस्थाका ऋणि सदस्यहरुको मृत्यु भएमा उनको नाममा बाँकी रहेको कर्जा मिनाहा गर्ने नीति लिएको संस्थाले २० जनाको १६ लाख २८ हजार ७९६ रुपैयाँ कर्जा मिनाहा गरिएको जनाइएको छ ।

त्यसैगरी संस्थाले बालबालिकाको शिक्षामा हौसला प्रदान गर्न छात्रवृत्ति उपलब्ध गराउने नीति अनुसार गत आवमा ७२ जनालाई ५ लाख ३९ हजार २०० रुपैयाँ खर्च गरेको छ । यसरी नै ज्येष्ठ नागरिकलाई भत्ता शीर्षकमा गत आवमा ५७ जनालाई ३ हजारका दरले १ लाख ७१ हजार रुपैयाँ वितरण गरिएको छ ।

संस्थाले ७१ जना सदस्यहरुलाई १ लाख ८० हजार ७५० रुपैयाँ विविध सुविधा प्रदान गरेको तथा सदस्यहरुको रकम सुरक्षाका लागि ५ लाख रुपैयाँको बचत बीमा समेत गरिएको जनाइएको छ।

तीन जिल्लाका ४२ स्थानमा सेवा केन्द्रहरु विस्तार गरेको संस्थाले सदस्यहरुको विशेष उपचार कोषको ब्यवस्था गरेको छ । सो कोषको सदस्य बनेकाहरुलाई विभिन्न दुर्घटना वा रोगको उपचार गर्दा संस्थाबाट १० लाख रुपैयाँसम्म उपचार खर्च ब्यहोर्ने नीति बनाइएको जनाइएको छ ।

संस्थाको आर्थिक वर्ष २०८० / ०८१ को असार मसान्तको वित्तीय बिवरण अनुसार शेयर पूँजी ५१ करोड ९३ लाख ७५ हजार ७०० रुपैयाँ तथा बचत २ अर्ब ७८ करोड ८३ लाख ९४ हजार ११० रुपैंयाँ रहेको छ । ५६ हजार ४०९ जना शेयर सदस्य रहेका छन् भने १५ हजार ३५० जनाले संस्थाबाट ऋण कारोबार गरिरहेको जनाइएको छ ।

संस्थाको ३ अर्ब ७६ करोड ८० लाख ४८ हजार १५६ रुपैंयाँ ऋण लगानीमा रहेको छ भने संस्थागत पूँजी १५ करोड ६२ लाख ९८ हजार ४७२ रुपैंयाँ रहेको छ । त्यसैगरी संस्थाको जगेडा कोषमा १३ करोड ६३ लाख ४९ हजार २४४ रुपैयाँ पुर्याएको छ भने विभिन्न कोषमा थप १२ करोड ९२ लाख ९६ हजार ४०२ रुपैंयाँ रहेको जनाइएको छ ।

संस्थाको कूल सम्पत्ति ४ अर्ब ५२ करोड ८२ लाख ८८ हजार ९३० रुपैंयाँ रहेको छ भने असार मसान्तमा संस्थामा २० दशमलव ७२ प्रतिशत अर्थात ५७ करोड ७६ लाख ६७ हजार ८२८ रुपैंयाँ तरलता रहेको छ।