दाङ । शिव शिखर बहुउद्देश्यीय सहकारी संस्थाले भालुबाङमा २८औं सेवा केन्द्र र गार्डेन मार्टको १९औं शाखा सञ्चालनमा ल्याएको छ ।

उपभोक्तालाई एउटै छानामुनि दैनिक उपभोग्यवस्तु लगायतका विभिन्न किसिमका सामग्री किनमेलको अनुभव दिलाउने उद्देश्यले दाङको राप्ती गाउँपालिकाको भालुबाङमा संस्थाले गार्डेन मार्टको १९ औं शाखा सञ्चालनमा ल्याएको हो ।

शनिवार राप्ती गाउँपालिकाका अध्यक्ष प्रकाश विष्टले एक विशेष कार्यक्रमकाबीच मार्टको शुभारम्भ गरेका थिए । अध्यक्ष विष्टले स्थानीयस्तरमा रोजगारी सिर्जना गर्न र स्थानीय उत्पादनलाई बजारीकण गर्न मार्टले सघाउने बताए ।

शाखा प्रमुख दानबहादुर थापाका अनुसार शिवशिखर बहुउद्देश्यीय सहकारी संस्थाद्वारा सञ्चालित यो मार्टमा दैनिक उपभोग्य बस्तु, चामल, चिनी, दाल लगायत सबै उमेर समूहका नागरिकलाई हुने लत्ता कपडा, बालबालिकाका लागि खेलौनाहरू उपलब्ध छन् ।

साथै महिलाहरूका लागि श्रृंगारका सामग्रीहरू, फ्रिज, वासिङ मेसिन, आइरन, गिजर लगायतका विद्युतीय उपकरणहरू मार्टमा उपलब्ध हुनेछन ।

संस्थाले यस अघि नै भक्तपुरको सूर्यविनायक, ललितपुरको ठैब, काठमाडौंको किर्तिपुर, उदयपुरको लाहान, चितवनको नारायणघाट, मकवानपुरको हेटौँडामा सेवाकेन्द्र र मार्ट संचालन गरिसकेको छ ।

त्यसैगरी बुटबलको योगिकुटीमा, नेपालगञ्जको न्यूरोड, सुर्खेतको वीरेन्द्रनगर, कैलालीको धनगढी, डडेलधुरा, दाङको घोराही, बाँकेको चाँदनीचोक, सुर्खेतको मेहलकुनामा गार्डेन मार्टको शाखा सञ्चालनमा ल्याइसकेको छ ।