काठमाडौं । समस्याग्रस्त नयाँ सन्देश बचत तथा ऋण सहकारी संस्थामा नयाँ कार्यसमिति चयन भएको छ । बुढानिलकण्ठ नगरपालिकाले सदस्यहरुको भेला गरी सहकारी सदस्यलाई नै हस्तान्तरण गरेको हो ।

नगरपालिकाको समस्याग्रस्त सहकारी व्यवस्थापन समितिले नयाँ सन्देशलाई २०७७ असोजमा समस्याग्रस्त घोषणा गरेको थियो । पूर्व न्यायाधिश छन्दप्रसाद आचार्यको संयोजकत्वमा सात सदस्यीय समस्याग्रस्त सहकारी व्यवस्थापन समिति गठन गरेको थियो ।

समितिको सुझाव अनुसार नगरपालिकाले नयाँ समिति निर्माण गरी थप काम अघि बढाएको जनाइएको छ । नगरपालिकाले संस्थाका फागुन २० गते शेयर सदस्यहरुको भेला गराएर हितबहादुर मोक्तानको अध्यक्षतामा नयाँ संचालक समिति गठन गरेको छ ।

संचालक समितिको उपाध्यक्षमा प्रदिप क्षेत्री, सचिवमा पुन्य प्रसाद स्नेही र कोषाध्यक्षमा सिद्धी साही चयन भएका छन् । त्यस्तै रामबहादुर श्रेष्ठ (सुनकाजी), माया तामाङ र विष्णु शाह ठकुरी सदस्यमा निर्वाचित भएका छन् ।

रामकुमार सुवेदीको संयोजकत्वमा तीन सदस्यीय लेखासुपरीवेक्षण समिति गठन भएको छ । समितिमा राजकुमारी श्रेष्ठ र उर्मिला तामाङ सदस्य छन् । बुढानीलकण्ठ नगरपालिका वडा नं. ५ मा संचालित नयाँ सन्देश सहकारीले सदस्यको २५ करोड रुपैयाँ भन्दा बढी रकम हिनामिना गरेको गरेको छ ।

समस्याग्रस्त सहकारी ब्यवस्थापन समितिले नगरपालिकालाई उक्त सहकारी पुनः संचालन गर्न सुझाव दिएपछि नगरपालिकाले सदस्यहरुको भेला डाकेर संस्थामा नयाँ संचालक समिति गठन गरेको जनाएको छ ।नगरपालिकाले नव गठिन संचालक समितिलाई संस्थाको  आर्थिक तथा संस्थागत प्रतिवेदन हस्तान्तरण गरेको छ ।

समितिको प्रतिवेदन अनुसार सहकारीका सदस्य २ हजार ५ सय छन् ।  रकम हिनामिना गर्ने यसअघिका अध्यक्ष सानु ठकुरी, उपाध्यक्ष राजकुमार ठकुरी, सचिव अबिन परियार र कोषाध्यक्ष सुरेन्द्र ठकुरी पूर्पपक्षका लागि जेलमा छन् ।

हालै उपाध्यक्ष चुनिएका क्षेत्रीले अब समस्या कसरी सल्टाउने भन्ने विषयमा गृहकार्य गरिरहेको बताए । ‘समस्या समाधानका लागि नगरपालिकासँग छलफल गरिरहेका छौं’ उनले भने,‘नगरपालिकाले कसरी सहयोग गर्छ, हामी कसरी अघि बढ्ने ?’

यो पनि पढ्नुहोला

नयाँ सन्देश सहकारीको  सञ्चालक समिति गठन गर्दै नगरपालिका

सहकारी व्यवस्थापन समितिले नसकेपछि पुनः सदस्यहरुकै जिम्मामा