काठमाडौं । संघिय सहकारी विभागका रजिष्ट्रार उमेश ढुंगानाले एउटै संस्थाको नियमन गर्न दुईवटा निकाय रहनु स्वाभाविक नरहेको बताएका छन् । उनले अब विभागको काम नियमन, प्रबद्र्धन र प्रशिक्षण भएकोले प्राधिकरणसँग पनि समन्वय गरेर थप प्रभावकारी काम गर्ने बताएका हुन् ।

शुक्रबार नेपाल सहकारी पत्रकार समाज (सीजेएन) ले सहकारी विभाग संगको समन्वयमा आयोजना गरेको, प्राधिकरण गठनपछि सहकारी विभागको भूमिका विषय छलफल कार्यक्रममा पेनालिष्टको रुपमा बोल्दै रजिष्ट्रार ढुंगानाले भने ‘प्राधिकरण र विभाग दुबै सरकारी निकाय हो ।

एकले अर्कोलाई नटेर्ने भन्ने हुँदैन, त्यो खालको छुट हामीलाई हुँदैन र नेपाल सरकारको निर्देशन मान्नुपर्छ । यति काम तिमीले गर यति काम तिमीले गर भन्यो भने हामीले त्यही निर्देशन अनुसार काम गर्ने हो,’ उनले भने ।

प्राधिकरणको काम बचत तथा ऋणको मुल कारोबार गर्ने संस्थाहरुको नियमन, अनुगमन गर्ने, कारबाही गर्ने, दर्ता खारेजी गर्नुपर्यो भने रजिष्ट्रारलाई सिफारिश गर्ने स्पष्ट म्यान्डेट रहेको उनले बताए ।

‘यी सबै म्यानेडट विभागको पनि घटेको छैन । भूमिका घटाइएको छैन’, उनले भने, ‘केही भूमिका डुप्लिकेशनको समस्या हो । हामीले केही नेपाल ऐन संशोधनमार्फत नल्याएर अलि छलफल गरेर ऐन ल्याउन पाएको भए माथिका कामहरु एउटै निकायको भूमिकामा राखिन्थ्यो होला ।

अथवा अर्को विषय भनेको प्राधिकरण नयाँ संरचना भएकोले उसले फुल फङ्सन गर्ने समयसम्म भ्याकुम नहोस् भनेर पनि विभागको भूमिका नघटाएको पनि हुनसक्छ ।’