काठमाडौं । सहकारी संघसंस्थाको एकमात्र बैंक राष्ट्रिय सहकारी बैंकको नव निर्वाचित संचालक तथा लेखा समितिको सपथग्रहण तथा प्रमाणपत्र बितरण कार्यक्रम थियो । जेठको १३ गते बुधबार बिहान ११ बजे (आज) सहकारी महासंघको सभाहल पुल्चोकमा । सातै प्रदेशबाट निर्वाचित संचालक तथा लेखा समितिका पदाधिकारी जम्मा भएका थिए।

निर्वाचन उपसमितिले निर्वाचितहरुलाई सपथ खुवाए र प्रमाणपत्र प्रदान गरे । मञ्चमा पार्टीगत संगै सहकारी बैंकका संचालक र सल्लाहकारको बरियताक्रम अनुसार अतिथि राखिएपनि भाषणको पालो नराखिएकोले निर्वाचन समितिका संयोजक र सदस्यले मात्र शुभकामना ब्यक्त गरे ।

बैंकका निवर्तमान भएका अध्यक्ष महेन्द्र गिरिले निर्वाचितलाई शुभकामना दिंदै भने, ‘अध्यक्षको जिम्मेवारीबाट बाहिरिरहँदा अलिक भावुक पनि भइदोरहेछ’ । थोरै समय लिखित बक्तब्य पढेर सुनाएका गिरिले आफु सहकारी बैंकमा १८ महिना अध्यक्षको जिम्मेवारीमा रहेको बताए ।

जिम्मेवारी सम्हाल्दैगर्दा विश्वासको संकट रहेको, सहकारी बैंक रहने की नरहने भन्ने अवस्थामा रहेको र चुनौतीपूर्ण अवस्थामा आफूले जिम्मेवारी सम्हालेको बताए । संकटपूर्ण अवस्थालाई चिर्न नबोली सामुहिक प्रयास गरेको र केही सकरात्मक नतिजा समेत देखाउन सकेको उनले बताए ।

आफूले बैंक बचाउन कर्मचारी कटौतीदेखि शाखा मर्जगर्नेसम्मको काम गरेको जनाए । साथीभाई संचालकलगायतलाई निर्मम भएर ऋणको काम गर्नुपरेको उनले बताए । बैंकको एनपिएल अझै रहेको र केही घटेपनि चुनौतिकै अवस्था रहेकोले नयाँ समितिले सामना गर्नसक्नुपर्ने उनको भनाइ थियो ।

नयाँ संचालहरुले आगोको भुंग्रोमा खुट्टा हालेकोले सजक र सतर्क रहन आग्रह गरे ।  उनले भने, अझै तीनवर्षसम्म नाफा बढ्नसक्ने अवस्थामा पुग्न गाह्रो छ, सिरियस भएर काम नगर्ने, रमाइलोको लागि अनावश्यक खर्च गर्ने काम भएभने, बैंक धरासायी हुने अवस्था आउँछ’ ।

उनले अझैपनि एककरोड वढी सेयर लगानी गरेका संस्थाहरुले प्रश्न गर्ने गरेको, शंका गर्ने गरेको भन्दै बैंक पूर्णरुपमा ब्यवसायिक बनाउन सल्लाह दिए । पहिलो पंक्तिमा संचालक र दोश्रो पंक्तिमा ब्यवस्थापनलाई राखेर ब्यवसायिक गतिविधि संचालन गर्न उनको आग्रह छ।

पूर्व संचालक र ठूलो सेयर पूँजी लगानी गरेको संस्थाहरुले ‘वाचडग’का रुपमा वर्तमान समितिको काम निगरानी गर्ने भन्दै, सकारात्मक भए पूर्णरुपमा सहयोग गर्नेसमेत बताए । साथै उनले नेफ्स्कून र बैंक बिच कार्यगत एकताको सम्झौता भइसकेकोले उक्त कार्यलाई निरन्तरता दिन आग्रह गरे । संगसंगै सहकारी बैंकमा निवर्तमान र सल्लाहकारका रुपमा कसैले सेवा सुविधा नपाउने ब्यवस्था समेत गरेको जनाए ।

सहकारी बैंक ब्यवसायिक संस्थाका रुपमा अघि बढ्नुपर्छ भन्ने मान्यताका साथ काम गरेकोले थोरै भएपनि उपलब्धि हाँसिल गरेको उनको भनाइ थियो । विभिन्न आरोह अवरोह आएको स्मरण गर्दै उनले भने, तँलाई पख्लास, देखाइदिन्छु भनेर जेलभित्रबाट समेत विभिन्न थरिका धम्कीसम्म आए, सवैलाई वेवास्ता गर्दै आजको दिनसम्म आइपुगदा गर्वगर्न लायक बैंक बनेको उनको दावी छ ।

बैंकको अहिलेको अवस्थाले गर्दा राष्ट्र बैंकले अघोषित रुपमा लगाएको पिएसए खोल्ने बाताबरण बनेको बताए । सहकारी संस्था विशुद्ध वित्तिय संस्था नभएर सामाजिक समृद्धिको अभियान भएकोले, सदस्यको आर्थिक सामाजिक कर्ममा सहकारी बैंकले संस्थामार्फत मद्धत पुर्याउनुपर्ने उनको भनाइ छ।