काठमाडौं । काभ्रेको बुडोल बनेपामा मुख्य कार्यालय रहेको बुडोल सामुदायिक बचत तथा ऋण सहकारी संस्थाले ग्लोबल मनी विकमा सप्ताहब्यापी कार्यक्रम गरेको छ । संस्थाले ‘बुद्धिमानीपूर्वक खर्च गर्नुहोस्, भोलि राम्रो हुनेछ’ भन्ने नाराका साथ सप्ताहव्यापी कार्यक्रम गरी ग्लोबल मनी विक २०२५ मनाएको हो । विभिन्न विद्यालयमा अध्ययनरत बालबालिका र युवाहरुलाई लक्षित गरी संस्थाले चैत्र ४ गतेदेखि १० गतेसम्म विद्यालयमा ‘बुसा’ कार्यक्रम मार्फत ३३१ जनालाई वित्तीय सारक्षता प्रदान गरेको थियो ।

कार्यक्रममा बालबालिका, किशोर किशोरी र युवाहरूलाई श्रव्य दृश्य सामग्रीको प्रस्तुतीमार्फत वित्तीय बजार, वित्तीय संस्था र यसका प्रकारहरु, बचतको महत्व, पैसाको प्रयोग, ऋणको परिचय, व्यक्तिगत बजेट निर्माणका विषयमा साक्षरता प्रदान गरेको थियो ।

त्यसैगरी सहकारीको परिचय, जंक फुडको प्रयोग र यसले पार्ने नकारात्मक असर लगायतका विषयमा पनि प्रशिक्षण गराएको थियो । संस्थाले श्री पूर्ण सञ्जिवनी लंखनामाई विद्यालय धुलिखेलको कक्षा ११ र १२ मा अध्ययनरत ३६ जना, ए.बि.एम स्कुल बनेपाको कक्षा ११ मा अध्ययनरत ६५ जना र प्रगति प्रभात स्कुल बनेपाको कक्षा ११ मा अध्ययनरत ५६ जनालाई वित्तिय शिक्षा प्रदान गरेको हो ।

यसैगरी सिद्धार्थ मावि बनेपाको कक्षा ११ मा अध्ययनरत ५१ जना, श्री पञ्चकन्या आधारभूत विद्यालय धुलिखेलको कक्षा ६, ७ र ८ मा अध्ययनरत ४५ जनालाई पनि संस्थाले वित्तिय शिक्षा प्रदान गरेको थियो । त्यसैगरी संस्थाले निस्ट स्कूल बनेपाको कक्षा ११ मा अध्ययनरत ५० जना र संस्थाको मुख्य कार्यालयको सभाहलमा २८ जना विद्यार्थीहरुलाई ग्लोबल मनी विकको अवसरमा ‘बुद्धिमानीपूर्वक खर्च गर्नुहोस्, भोलि राम्रो हुनेछ’ भन्ने शिक्षा प्रदान गरेको छ ।

विद्यालयहरुबाट संस्थाले व्यवहारिक शिक्षाको माध्यमबाट विद्यार्थीहरुलाई पैसाको व्यवस्थापन गर्न सिकाएकोले प्रभावकारी भएको र आगामी दिनमा पनि यस्ता कार्यक्रमहरुको अपेक्षा रहेको बताएका थिए । बालबालिका र युवाहरुमा वित्तीय साक्षरता अभिवृद्धि गर्दै वित्तीय ज्ञान, सीप, मनोवृत्ति र व्यवहारको विकास गर्ने उद्देश्यका साथ आर्थिक सहयोग र विकास संगठनको संयोजनमा सन् २०१२ देखि हरेक वर्ष ग्लोबल मनी विक (Global Money Week-GMW) विश्वभर मनाउने गरिएको छ । यसै सन्दर्भमा बुडोल सामुदायिक साकोसले वित्तीय सारक्षता सम्बन्धी विभिन्न कार्यक्रम गर्दै हरेक वर्ष ग्लोबल मनी विक मनाउँदै आएको जनाइएको छ।